Прызнанні ў светлых пачуццях саграваюць мільёны душ па ўсім свеце 14 лютага.
Свята закаханых адзначалі і ў нашым універсітэце. З самай раніцы ў фае другога паверха бібліятэкі працавала пошта для ўсіх жадаючых адправіць любоўнае пасланне. На хуткую руку, спяшаючыся на заняткі, пісалі студэнты самыя патаемныя словы.
А самай яркай падзеяй Дня закаханых стала мерапрыемства пад назвай "Аб каханні на розных мовах", праведзенае ў рамках "Адкрытага мікрафона". Мерапрыемства было адкрыта вершам Яўгеніі Янішчыц “Ты пакліч мяне, пазаві”, які з'яўляецца візітнай карткай беларускай любоўнай паэзіі.
Гучалі ўпадабаныя вершы вядомых паэтаў, якія знайшлі жывы водгук у кожнага прысутнага. Прагучала меладычная шрыланкійская кампазіцыя ў выкананні студэнтаў факультэта падрыхтоўкі замежных грамадзян.
На англійскай, рускай, беларускай, арабскай і нават экзатычных сінгальскай і тамільскай мовах прагучалі вершы пра каханне.
Адкрыццём мерапрыемства сталі аўтарскія вершы траіх нашых студэнтаў, адначасова лірычныя і глыбокія, якія раскрылі разнапланавасць гэтага светлага пачуцця пад назвай "каханне".
У завяршэнне мерапрыемства прагучаў раманс на верш Сяргея Ясеніна «Пой же, пой на проклятой гитаре».
